《出版及數碼推廣組》
梗有啲時候夜闌人靜時，就無啦啦諗起那些封塵既「第一次」回憶，尤其做會長呢啲「非常時期」，往事百般滋味在心頭，今次「出版及數碼推廣組」同大家發掘「半島」會長 Jackal 既「第一次」
問: 第一次係「半島」碰釘?
會長:
其實工作計劃層面上係近乎無嘅，因為有好多顧問，資源同後備方案。(咁個人呢?) 個人黎講，係我做 2016 年秘書長時，開頭唔太習慣，要準備好多報告同聲明文件比總會，過左限期做唔切而影響左啲行政紀錄。其實係有人提過我架，但自己忙到無放在心上。限期當日因為工作無法開電腦，唯有眼白白睇住件事死咗⋯我好記得當時係成個人呆左，好似石化左咁。事後我終於明白點解要一早計劃分工，預早分配工作俾下線，或者鼓勵佢參與多啲。咁做唔係想佢地包底，而係遇到好似呢啲咁極端嘅情況，可以即刻搵佢地求救，咁就可以避免碰釘嘞!
問: 第一次覺得無助?
會長:
2014 年我係社會發展董事，做「我們愛讀書」工作計劃。個計劃目的係去貴州探訪山區兒童同建校，同時反映實況俾當地教育局。由於負責接待既官員同我地嘅著眼點唔同，所以需要較多時間磨合同推動進度。當時我真係感到好無助，最後幸得組別顧問 Senator Ronnie 出手相助，接手處理兩地協調工作，咁先令整個計劃有明顯進度，而我就協助主席同籌委會安排物資及流程等安排。
問: 第一次想放棄會務?
會長:
講真無試過放棄會務，放棄諗法就有嘅。做主席/董事/副會長時，好多時自己有一啲想法或堅持，初時以為好好，好想做，但去到開會同籌委會傾嘅時候，發現佢地好有個人諗法，就知自己要退後一步，比佢地試下做佢地想做嘅方向，而唔係將自己嘅想法加諸於大家身上。所以我係放棄左啲構思同計劃，但能夠換來成個團隊同每位會員嘅滿足感，我覺得十分值得！
希望籍著會長 Jackal 今次真誠剖白自己「第一次」嘅經驗，令大家明白每位會員嘅青商之路都係充滿挑戰同經歷，一路走來，點點滴滴。同時大家遇到困難時可以作借鑑之用。